Tỉnh Sơn La muôx 5 thax qơư por hưv tsiax kuk, đrox tsuôs, 1 thax tsav por hưv qơư cênhz cưv, 1 thax qơư por hưv tsiax kuk, đrox tsuôs 11 kror qơư uô si. Truôx siaz por hưv tsiax kuk, đrox tsuôs cov tâu jông, tỉnh tưz tso tơưv tsưr ziv por hưv tsiax kuk, đrox tsuôs trâu cêr tuôr xav tỉnh thiaz hâux lưv saiz car Têz qơưk lok sâuv por hưv tsiax kuk, đrox tsuôs. Txos nhiv no, hur si tỉnh muôx 12 ban chox car por hưv har jôngr, phax tar tuô hluôr tơưk cuz cấp huyện; 202 ban chox car por hưv har jôngr, phax tar tuô hluôr tơưk cuz cấp xã, phường, thị trấn; 2.789 tổ, paz pơưs por hưv har jôngr, phax tar tuô hluôr tơưk cuz jôngr; 12 hạt kiểm lâm, 2 ban saiz car, por hưv har jôngr; 3 ban saiz car jôngr lâuk, đros trâu yênhx puô lênhx cán bộ, công chức, viên chức ngành kiểm lâm taz tov lês jông côngz xưv por hưv har jôngr thiaz tsiax kuk đrox tsuôs.

Lês jông côngz xưv saiz car Têz qơưk lok sâuv por hưv tsiax kuk, đrox tsuôs, hnuz 3/5/2024, UBPX tỉnh Sơn La tưz tso tơưv cêr tuôr xav têz qơưk por hưv tsiax kuk, đrox tsuôs txos shông 2030, tsov xav txos shông 2050 hâur thax tsav tỉnh. Hâu ntơư, tso tơưv 5 zav hâux lưv zov chênhr: Moz siaz por hưv tsiax kuk, đrox tsuôs; por hưv têx tsiax, đrox tsuôs muôx grik; cxênhz, nthuôr huôv jông qơư sơưr ntơưv têx tsiax kuk, đrox tsuôs chia paz trâu hâux lưv huôv tsar truôx njês, phax tar ntux yar, ntux nas hiav, fiv huv huôz chuô txơưr txar; cxênhz yuôx têx hâux lưv hiav txos por hưv tsiax kuk, đrox tsuôs.

UBPX tỉnh chox car têx sở, ngành cxaz nzir pênhr xưv lês ntov têx cêr chai lok sâuv por hưv tsiax kuk, đrox tsuôs đhâu têx hâux lưv kriz kria nzir tsưr ziv trâu pêx xênhv; lês têx cêr tuôr xav lok sâuv por hưv tsiax kuk, đrox tsuôs hâur tuôr xav cêr chai, têx dự án; moz siaz tsov xav tsưr ziv, huôv tsar, zok nriar thiaz sir zôngv tsưr ziv yiaz hâur por hưv thiaz sir zôngv truôx njês têx đrox tsuôs; gruô hu sir zôngv nhiax ODA trâu hâux lưv por hưv tsiax kuk, đrox tsuôs; lês siv, fuô lês sir zôngv tsưr ziv muôz nhiax por hưv por hưv tsiax kuk, đrox tsuôs; moz siaz đros tỉnh Yên Bái siz khov cxiv tsa Qơư por hưv tsiax kuk, đrox tsuôs Mường La thiaz Mù Cang Chải, chia cov siz chos huôv tsar, yax hlo zos hâur fuô lês cêr chai muôz nhiax por hưv har jôngr.

Đros trâu tsưr ziv lês hâux lưv mênhx pêv, tỉnh Sơn La tuôr xav txos shông 2030, kriz đar thiaz lês jông hâux lưv saiz car har jôngr; por hưv jông têx tsiax kuk, yax hlo zos têx tsiax kuk zuôr tu nôngz, tâu por hưv jông, chia cov tsik muôx nzir têx zav tsiax tu nôngz; têx tsiax kuk thiaz đrox tsuôs tâu tsưx truôx thiaz por hưv; cxuô faz tsưr ziv tâu tỉnh fuô lês cxix cxuô, fiv huv cêr tuôr xav; 100% cêr tuôr xav, dự án lês hâux lưv têz qơưk tâu lês đros hâux lưv por hưv tsiax kuk, đrox tsuôs.