Txix hâu shông txos nhiv no, hur si tỉnh tưz tok tâu yax 3 triệu lưv kruô, tsar 17% njuôk li chaix no tsaiz no; xav hur si sâu tâu 3.490 tỷ nhiax nuôv zax. Hâux lưv no kria pâuz têx qơư nuôv zax jông hâur tỉnh zênhv hnuz zênhv muôx ntâu lênhx pâuz txos, tuôx shuôk thiaz nuôv zax, hâur ntơư, nuôv zax hmo ntux taz tov yênhx iz kror qơư zov chênhr, paz muôx ntâu kror qơư nuôv zax jông chia trâu têx kruô tuôx ndis shuôk.  

Tâu cxiv tsa sâuv thax ar đar yax 33.000 thiar xưv phaz, xav hur si yax 350 tỷ nhiax, Phim trường - Phố muk tơư Mộc Châu ntơưv phường Thảo Nguyên tâu cxiv tsa txix đraz shông 2022. Tâu bax ntâu thax tsav, li: Tsêr tsar lơưx Tây Bắc, yar tiax lox trung tâm, thax tsav muôs jâuz mor, bảo tàng, yar tiax nthuôr txux chi thiaz qơư uô si. Yênhx thax tsav muôx têx kror txơưr, chơư chôngz kruô tuôx shuôk thiaz nuôv zax. Kror uô trâu ntâu tus kruô nhiav ntơư mak zos tâu pâuz mênhx đuô pêx xênhv thax tsav luz nênhx thiaz txux chi. Têx jax tuôr têk sênhr chêr, đhia pak tâu pêx xênhv thiaz kruô nuôv zax siz chos nthuôr lov jêv ntưk. 

Niav lâuk Nguyễn Thu Trang, kruô nuôv zax nhoz Hà Nội, kria pâuz: Cur tưz muôx ntâu jias tuôx shuôk Sơn La, taz sik jâus no cur pov txơưr đuô thâuv tuôx ndis shuôk Phim trường-Phố muk tơư. Hmo ntux ntơưv no lok six đrôngx ntưk. Cur nhiav yax mak tâu đros pêx xênhv côngv sênhr chêr, đhia pak. Ntơư zos têx jias ndis shuôk tsik zôngx ziv pov muôx ntơưv zuk qơư nhoz. 

Tơưv kror qơư đrông ntưk ntơưv phố muk tơư, kruô nuôv zax zuôr pov tâu đuô kror jông txơưr ntơưv qơư nthuôr txux chi thiaz ndis shuôk nhoz tổ dân phố Vặt Hồng, phường Mộc Châu. Thax tsav no muôx yax 30 qar tsêr huv tâu muôz shôngz uz no uô. Pêx xênhv nthuôr muôs tox siaz têx kôngz txir nox, jâuz mor kaz li: Txir khơưz, jâuz hur, mor trax, njêk chi, graix kaz puôz, hmor blâuv tsiz xiv đros ntâu hax huv xuôk têk uô cênhz cưv. Yênhx qar tsêr huv puôr lênhx zos têx jax đaz nênhs thav txos luz nênhx, cêr chai thiaz pêx xênhv cxuô hair nênhs taz tov nhoz hâur lax trôngz Mộc Châu têx txux chi jông.

Niav lâuk Lường Thị Hồng Tươi, pêx xênhv tổ dân phố Vặt Hồng, haik pâuz: Têx hâux lưv nuôv zax hmo ntux tưz paz pêx xênhv kria pâuz thax tsav têx kôngz txir, kar nox jông, đros ntơư, tsênhv kria kruô nuôv zax hâur têz qơưk thiaz oz chas têz pâuz têx txux chi cênhz cưv kror muôx gri. 

Yênhx qơư nuôv zax hmo ntux ntơưv Sơn La nưk muôx nưk têx kror txơưr taz sik puôr lênhx zos txuôs jông thiaz huôv tsar txux chi cênhz cưv kror muôx gri. Đhâu yênhx jax tuôr têk sênhr chêr, haik cưr cxiax tênhx tus, suôz kênhx hu fôngx zưs lok sik têx jâuz mor kaz, kruô nuôv zax ho pâuz mênhx đuô tiz nênhs Tây Bắc luz nênhx thiaz cêr xar.

Tix lâus David Brown, kruô nuôv zax tuôx ntơưv têz qơưk Phaz Cir, thav: Cur pov pêx xênhv ntơưv no lok six nhiav kruô. Moz siaz kria trâu cur pâuz nthuôr têx hâux lưv txux chi. Tâu đros sênhr têx jax sênhr chêr cênhz cưv, nox jâuz mor kaz thax tsav thiaz đros pêx xênhv thax tsav thav, paz cur pâuz mênhx đuô txux chi Tây Bắc ntơưv Việt Nam.

Nhiv no, Sơn La tsênhv huôv tsar ntâu hax huv nuôv zax hmo ntux li Ciaz tênhv chaix Chiềng Đi 1 nthuôr txux chi Hmôngz; Phố muk tơư Sơn La chơư chôngz kruô nuôv zax tuôx ndis shuôk têx hâux lưv nthuôr txux chi, haik cưr cxiax thiaz jâuz mor kaz lov jêv ntưk; Tà Xùa muôx qơư nuôv zax jông saiz huôz pư har, hnuz kuz thiaz pâuz mênhx pêx xênhv thax tsav luz nênhx thâuv tsâus ntux. Kror huôv tsar fiv huv txux chi cênhz cưv thiaz têx hâux lưv ndis shuôk, paz xav tơưv ntâu hax huv nuôv zax jông, chơư chôngz kruô tuôx shuôk thiaz nuôv zax.

Txix hâux lưv huôv tsar nuôv zax truôx njês, nuôv zax hmo ntux cxơưz Sơn La tsik tsês huôv tsar. Thâuv txux chi yênhx qơư chuôz jos paz huôv tsar, jêx jok zuôr yênhx kror qơư nthuôr têx hâux lưv nuôv zax, têx qơư huôv tsar nuôv zax hmo ntux tror kria cxuô kror qơư pâuz đuôz thax ar thiaz tiz nênhs Sơn La, txuôs jông thiaz huôv tsar txux chi cênhz cưv kror muôx gri, xav tơưv ntâu kror jông txơưr hlo, cxiv tsa nuôv zax Sơn La zênhv hnuz zênhv tsik tsês huôv tsar./.