Hâux lưv "Yar cơưv siz hluz - Paz shuv xênhz cơưv ntơưr” tâu cxiv puôz ntơưv tsêr cơưv mê nhuôv zâuk jok Tràng Nặm, zos Yar cơưv Mầm non Hoa Ban saiz car. Tov kaz zuôr luôs 4 hli uô tsik tsês, hâux lưv no tưz tâu uô tiar muôx 2 qar tsêr cơưv khor kho, đar 210 thiar xưv phaz, 1 qar tsêr trâu cưk kria nhoz, faz nja, trur vor yar tiax lox yar cơưv thiaz yar tiax lox bê tông đar 250m². Jias no, têx đơn vị tsênhv krưr ntâu chuôz zênhx zov chênhr, li: Máy liv đêx, far txiak, lâux câuz uô tâu ntâu zav, chuôz zênhx cơưv ntơưr trâu yar cơưv.

Cux zos hnuz ntơư, têx đại biểu tsênhv lês txox chai đhos fiax, muôz zok sir zôngv Hâux lưv “Tơưk tênhz pov cêr txox cêr jêx jok đriv têz” ntơưv têx jok Đin Chí, Chiềng On thiaz Trạm Hốc. Hâux lưv mak muôx têx txox cêr tơưk tênhz pov cêr zôngv điện yar ntux xav hur si ntêr 5,25km, đhos 253 luz kê tênhz.

Xav hur si luôs hâux lưv no tsiv nhos zuôr luôs 1,5 tỷ nhiax; hâur ntơư, hâux lưv cxiv puôz tsêr cơưv ntơưr yax 1 tỷ nhiax thiaz tơưk tênhz pov cêr txox cêr jêx jok tsiv nhos zuôr luôs 420 triệu nhiax, đuô li zos huv krưr têx yar cơưv. 

Têx hâux lưv chox tâu tuz lênhv pêx xênhv cêr thôngx siaz, siz hluz siz paz, ntuôk pêx xênhv tso siaz nhoz truôx qơư, đros Tuz lênhv Đriv têz por hưv truôx njês đriv têz qơưk nhoz njias to./.