Lês hâux lưv đros đraiv xưv cxênhx choz kria ntơưr

Shông 2001, Hội Cxơưz paz cêr cơưv shâuv tỉnh Sơn La tâu tsa tơưv, ntơư zos thơưx jâus lês cêr siz tưr ntơưv iz luz tỉnh tox siaz. Hâur 25 shông đhâu, têx nênhs lês côngz xưv cxơưz paz cêr cơưv tưz moz siaz gruô hu, zaz zâuv têx cêr paz chia cxiv tsa pênhr nhiax cxơưz paz cêr cơưv shâuv ntơưv têx tổ, jok, tiểu khu thiaz paz lês nto mông cêr siz tưr txos trâu yênhx thax tsav, tâu chôngz lênhx moz siaz côngv lês. Hur si tỉnh nhiv no muôx 26 hội, ban cxơưz paz cêr cơưv shâuv zos Tỉnh hội saiz car, 4.069 chi hội cxơưz paz cêr cơưv shâuv jok, tiểu khu, tổ dân phố, ban cxơưz paz cêr cơưv shâuv têx cơ quan, chuôz xênhv, đros trâu yax 380.000 hội viên, txênhz 29% têx nênhs nhoz hâur tỉnh. 

Pos Mai Thu Hương, Chủ tịch Hội cxơưz paz cêr cơưv shâuv tỉnh, haik pâuz: Tov kaz lês nov hâu thax tsav 2 cấp, Hội tưz tror moz siaz cxiv kho, lês jông đuô hâux lưv hội, ban cxơưz paz cêr cơưv shâuv ntơưv têx cơ quan, yar cơưv, tsêr luôv thiaz têx lực lượng vũ trang thax tsav hur si tỉnh. Đros ntơư, moz siaz zok nriar, saz lax lês tiar hâux lưv cxiv kho đuô tổ chức Hội Cxơưz paz cêr cơưv xã, phường hâur 3 hli hâu shông 2026.

Côngz xưv cxiv tsa Pênhr Cxơưz paz cêr cơưv tâu moz siaz txos. Txos nhiv no, hur si têx pênhr hâur tỉnh tưz tâu yax 25 tỷ đaiv. Têx hâux lưv trơưk chaix tâu kriz li “Hli 9 paz cơưv shâuv”, “Hnuz grâuv pax Cxơưz cêr cơưv”; têx hâux lưv “Đros shuv xênhz muk cơưv ntơưr”, “Tsiaz trâu shuv xênhz” tưz yênhx têx hâux lưv muôx txiax njis thiaz gruô hu tâu chôngz lênhx nênhs siaz đơưz, tsêr luôv moz siaz txos, paz muôx yênhx châuv cxênhz poz huv trâu têx shuv xênhz, sinh viên njiz ntâu cêr phiv liv, têx shuv xênhz cơưv coz.

Yax hlo, têx zav cêr siz tưr Cxơưz paz cêr cơưv shâuv zos thâuv cxiv tsa tâu thiaz huôv tsar Pênhr nhiax Tô Hiệu, yax 18 tỷ đaiv. Txix li faz tsưr ziv lês fiv huv, têx pênhr nhiax tưz tsưx tâu jông hâur yênhx shông.

Iz chas ntơư, côngz xưv cxơưz paz cêr cơưv shâuv tsênhv tâu kriz đar txos trâu têx jias cơưv hâur pâuk ntơưr, kria luk hair nênhs tsơưs, kria uô hâux lưv ntơưv têx Trung tâm cơưv shâuv ntơưv jêx jok, paz trâu pêx xênhv nhoz tox siaz, đêz đrôngs tâu pâuz têx tsưr ziv yiaz lok paz max trâu luz nênhx. Shông cơưv 2024-2025, hur si tỉnh tưz kriz yiaz 45 lớp kria hâur pâuk ntơưr trâu 1.500 lênhx nênhs, cxaz nzir têx nênhs pâuz ntơưr muôx txix 15-60 shông tâu 96%; tsưx tâu jông hâux lưv kria hâur pâuk ntơưr ntu 2 hâur hur si tỉnh; têx shuv xênhz muôx txix 15-18 shông muôx ntơưr cơưv tas THCS tâu 90,3%.

Cxiv tsa xã hội cơưv shâuv

Cêr siz tưr cxơưz paz cêr cơưv tưz huôv tsar txos trâu cxuô qơư, chuôz jos zov chênhr cxơưz paz cêr cơưv trâu têx zis nênhs, jêx jok, zênhx max cxơưz jos têx nênhs moz siaz hla đhâu cêr phiv liv, cơưv coz. Xav txos shông 2025, hur si tỉnh muôx 742.335/1.404.587 “Pêx xênhv cơưv shâuv”, txênhz 52,8% toz hâu nênhs; 244.713/293,169 “Zis nênhs cơưv shâuv”, txênhz 83,47%; muôx 1.176 “Chuôz xênhv cơưv shâuv”; 1.974 “Jêx jok cơưv shâuv”; 902 “Đơn vị cơưv shâuv”.

Zos iz hâur têx “Chuôz xênhv cơưv shâuv nto mông” ntơưv xã Thuận Châu, chuôz xênhv Lò nhoz trâu jok Ba Nhất puôr lênhx tsưx tâu jông cênhz cưv cơưv shâuv. Zơưs Lò Văn Tiển, Txir ndâux, txir luk chuôz xênhv Lò, thav pâuz: Chuôz xênhv muôx 30 zis, 150 lênhx nênhs, nhoz trâu jok Ba Nhất 1 thiaz Ba Nhất 2, muôx 2 lênhx cơưv tas thạc sĩ; 12 lênhx cơưv tas đại học taz tov uô côngz xưv ntơưv têx cơ quan, tsêr kho moz, đơn vị lực lượng vũ trang; muôx 5 lênhx taz tov cơưv đại học thiaz zuôr luôs 50 lênhx zos shuv xênhz cơưv txix li thênhv mê nhuôv zâuk txos trâu thênhv THPT. Têx zis nênhs hâur chuôz xênhv puôr lênhx tsưx jông cêr thôngx siaz, siz hluz, siz paz.

Cêr siz tưr “Chuôz xênhv trâu siaz cơưv ntơưr” tưz nto mông txix ntơưv đrôngs txos trâu têx jêx jok tox siaz, đriv têz, txix ntơư paz trâu têx shuv xênhz, pêx xênhv hâur jêx jok cxiv tsa xã hội học tập. Shông 2024, thành phố Sơn La tâu UNESCO kruôk zos "Thành phố cơưv shâuv hur si ntiax têz" nhiv no zos Liên minh têx paz pơưs cơưv shâuv ntơưv Sơn La hâur têx phường: Tô Hiệu, Chiềng Sinh, Chiềng Cơi, Chiềng An. Ntơư zos têx zav jông, muôx txiax njis ntơưv saz Choz kria ntơưr kruôk txos cêr sir jos hâur ntu cxiv tsa cêr cơưv shâuv.

Zơưs Hoàng Mạnh Hà, Thơưx Phòng Txux chi-Xã hội phường Tô Hiệu, haik pâuz: Hli 10/2025, phường Tô Hiệu jông siaz tâu hlôngr trâu Liên minh jêx jok cơưv shâuv ntơưv Sơn La muk côngv Jias cơưv ntiax têz lok sâuv cxiv tsa thành phố cơưv shâuv hur si ntiax têz ntơưv Thượng Hải (Trung Quốc). Jias no tưz saz lax, kria txos têx tsưr ziv cxiv tsa cêr tuôr xav mênhx pêv, chia chos luk đros UNESCO lok sâuv cơưv shâuv tsik tsês. Ntơư zos jias chia Sơn La cơưv shâuv têx qơư lês tâu hâux lưv jông, đros ntơư, kria txos têx cêr sir jos ntơưv Sơn La txos trâu têx paz pơưs ntiax têz.

Lês trơưk Đề án “Cxiv tsa xã hội cơưv shâuv ntu 2021-2030” hâur thax tsav tỉnh, côngz xưv cxiv tsa xã hội cơưv shâuv tror tâu moz siaz lês jông, gruô hu tâu cxuô cấp, ngành, thax tsav hâur tỉnh siz chos lês, paz zôngx ziv chia cxuô lênhx pêx xênhv tâu cơưv shâuv tsik tsês hâur ntu nênhx yiaz nhiv no.

Pos Mai Thu Hương, Chủ tịch Hội cxơưz paz cêr cơưv tỉnh, thav pâuz nzir: Lês côngz xưv cxiv tsa xã hội cơưv shâuv hâur ntu nênhx yiaz, Hội tror moz siaz fuô kria, zaz zâuv fuô lês têx cêr siz tưr cxơưz paz cêr cơưv, kriz đar têx qơư lês tâu hâux lưv jông; moz siaz siz khov đros Sở choz kria ntơưr cxiv tsa xã hội cơưv shâuv cov fiv huv thiaz truôx njês.

Côngz xưv cxơưz paz cêr cơưv shâuv ntơưv Sơn La zos qơư paz lês tiar têx cêr nyơư, cêr chia siaz. Têx nênhs cơưv coz taz tov tâu cxơưz paz cias ntơưv cxuô thax tsav, cxiv tsa tâu têx nênhs moz siaz cơưv shâuv, muôx pênhr xưv, siz chos cxiv tsa luz nênhx vav mênhx, huôv tsar.