Jâus no muôx têx đồng chí: Nguyễn Thành Công, Phó Chủ tịch UBPX tỉnh; Nguyễn Việt Cường, Phó Chủ tịch HĐPX tỉnh; nênhs hlôngr njêx muôs Cục Chos thiaz Por hưv kôngz lông; têx cơ quan chuyên môn, tổ chức ntiax têz, hiệp hội ngành hax huv, tsêr luôv, HTX thiaz nênhs hlôngr njêx muôs iz cxia tỉnh. 

Nhiv no, Sơn La muôx yax 44.000 ha cà phê, xav shông 2026 sâu tâu zuôr luôs 51.000 tấn cà phê nôngz, zos thax tsav chos ntâu cà phê Arabica yax hlo hâur hur si têz qơưk. Tỉnh tưz cxiv tsa 2 thax tsav chos cà phê sir zôngv chuôz zênhx jông, đar yax 1.039 ha; 6 kror qơư siz chos huôv tsar yax 2.170 ha; muôx 28 tsêr luôv, HTX côngv chos, tu jông cà phê. Iz chas ntơư, tsênhv huôv tsar yax 1.100 ha cà phê kaz txơưr hlo, xav hur si sâu tâu 1.000 tấn cà phê nôngz. Cà phê Sơn La tâu puz ntơưr kria pâuz qơư chos shông 2017, muôx njêx muôs trâu yax 20 têz qơưk.

Taz sik, cà phê Sơn La tsênhv muôx ntâu kror lês tsik muôx kaz hâu, li kror jông ntơưv chor huv sir tsênhv tsik siz bâus, iz cxia têz cà phê lâuk tsuv tâu cxiv kho; hâux lưv sir zôngv tsưr ziv, siz chos huôv tsar thiaz tu jông tsênhv tsik bâuv li têx kror muôx. Iz chas ntơư, têx kror taix cov txâuk chai ntơưv cêr lax luôv lok sâuv uô jông uô, pâuz mênhx qơư chos, por hưv đêx ar huôz chuô nyiaz hur thiaz tsik ruôr hiav jôngr taz tov uô trâu nênhs chos cà phê thiaz tsêr luôv njiz ntâu cêr txov nhêv.

Jâus no, têx chuyên gia, tsưr khoa học tưz kria pâuz kror taix nus trâu hâux lưv huôv tsar cà phê Sơn La hâur ntu đêx ar huôz chuô txơưr txar thiaz hlôngr huôv tsar kôngz lông hur. Têx ndâux luk haik mênhx kror zov chênhr tsuv hlôngr yiaz tsưr ziv huôv tsar, thax tsav chos, sir zôngv muôx kaz hâu đêx ar thiaz grik tsơưs đêx ar huôz chuô cêr ruôr hiav; iz phênhv tưs cxiv tsa thax tsav chos cà phê truôx njês, paz tâu zênhx max cêr lax luôv nhiv no.

Têx đại biểu cux saz lax tsưr ziv huôv tsar cà phê jông, cà phê kaz txơưr hlo; tsik tsês tâu kror siz chos lês ntơưv tsêr luôv, HTX thiaz tuz kôngz hâur jias huôv tsar, saiz car ntov nti cà phê. Đros ntơư, tsik tsês sir zôngv chuôz zênhx yiaz lok xav tơưv têx hax huv jông, tik bê lax luôv thiaz kriz đar cêr uô luôv cà phê Sơn La.

Đros trâu kror taix nus ntơưv cêr lax luôv oz chas têz, têx ndâux luk khov tsik tsês cxiv tsa kror qơư sâu tsês ntâuz ntơưr thax tsav, kror qơư thiaz chiav têz chos; tsik so cxênhz yuôx qơư chos, txâuk Cêr chai tsik ruôr hiav jôngr ntơưv Liên minh châu Âu (EUDR). Đros ntơư, tsênhv paz tuz kôngz, HTX thiaz tsêr luôv fuô lês têx kror txâuk chai lok sâuv pâuz mênhx qơư chos, nhav nxias hax huv txâuk chai muôs trâu oz chas têz. 

Câuk luk jias saz lax, đồng chí Nguyễn Thành Công haik mênhx: Sơn La tsov xav huôv tsar cà phê trơưk faz truôx njês, hur si, tsik tu trơưk lưv ciz, đros trâu por hưv đêx ar huôz chuô nyiaz hur thiaz paz pêx xênhv sâu nzir nhiax zôngv. Tỉnh tror moz siaz cxênhz yuôx, cxiv tsa qơư chos txâuk chai muôs trâu oz chas têz; tsik so txiar chês, cxiv kho têz, tsov xav, hlôngr chos nôngz yiaz thiaz sir zôngv chuôz zênhx yiaz lok huôv tsar cà phê hloz jông. Đros ntơư, moz siaz huôv tsar cà phê kaz txơưr hlo, gruô hu têx dự án cxưx nhiax tu jông thiaz muôx gri. Đồng chí xar cov tror nhav tâu kror đros uô, têx ndâux luk kria muôx liv ntơưv têx chuyên gia, tsưr khoa học, tổ chức ntiax têz thiaz tsêr luôv, paz huôv tsar cà phê Arabica Sơn La truôx njês, paz tâu zênhx max cêr lax luôv hâur têz qơưk thiaz oz chas têz.