Ngọc Chiến ntêx lok tâu pir li “jêx jok lâuk đrav ntêx”, muôx têx tsêr tsar lơưx vor chiaz yênhx puô shông, jôngr txir tuôz ziz, têx liax kiz ntai thiaz đêx sor. Ntơưv no tsênhv côngv chox kruô nuôv zax cxuô thax tsav nto mông Mù Cang Chải, Sa Pa (Lào Cai), Lai Châu thiaz Hà Nội đhâu cêr têz qơưk 32, muôx cêr siz khov thiaz zôngx ziv chia têx zav lax luôv, têx zav, nuôv zax zênhv hnuz zênhv huôv tsar.

Zơưs Dương Xuân Nam, Phó Chủ tịch UBPX xã Ngọc Chiến, thav pâuz: Xã  saiz hloz gruô hu cxơưz cxiv lax luôv, têx zav, nuôv zax txix jav cêr jông uô luôv mênhx pêv, zôngx ziv, côngz fênhx; kho đuô ntơưr hành chính, zôngv chuôz zênhx thiaz hlôngr số. Đros ntơư, tsik so cxênhz muôs huv zuôv chai, huv chuôr, huv tsik jông; gruô hu nhiax txiax cxiv tsa cxuô zav, paz huôv tsar lax luôv-têx zav zuk thax tsav.

Têx cêr yêz muk lok zôngx ziv paz pêx xênhv kriz đar qơư lax luôv, muôs hax huv, txix têx zav nox hâuk txos tưx taik sir hâur vax tsê, điện tử... Txix li yax 10 shông uô luôv cxuô zav huv ntơưv trung tâm xã Ngọc Chiến, muôv Lò Thị Thủy, jok Đông Xuông, thav pâuz: Cêr khov zuôr huv ntơưv pêx xênhv thiaz kruô nuôv zax zênhv hnuz zênhv chôngz, li ntơư cur kriz đar thaz nzưr muôs huv, ntâu tsar zav huv, xuz muôs huv Việt jông, pâuz mênhx qơư uô tơưv. Txix ntơư, thaz nzưr nto mông, yênhx qơư njênhs ntơưv nênhs sir zôngv. Nhiv no thaz nzưr cux sir zôngv thêv nhiax tsik chêr ntơưv têk, zôngx ziv trâu kruô tuôx zuôr huv.

Đros trâu têx hâux lưv lax luôv, têx cêr nuôv zax thax tsav xã cux saiz hloz, muôx ntâu zav, chok nxaik kror txơưx tsênhz, vav mênhx hâur paz max, fiv huv cêr khov ntơưv pêx xênhv thiaz kruô nuôv zax. Nhiv no, tas nro xã muôx 35 tsêr kruô so homestay, đros 40 luz tsêr tsar, 60 bungalow  thiaz 120 qar tsêr jông ntov, fiv huv cêr khov so hnuz hmo trâu 12.000 pưs kruô /shông, nhiax nuôv zax sâu tâu li 12 tiv đaiv.

So ntơưv tsêr homestay Suối Chiến jok Mường Chiến, gas siaz trâu pêz mak zos luz tsêr tsar tâu uô tas nro zos ntông chiaz, ntơưv no njia pov têx đrak liax thiaz tox trôngz jêx jok ntơưv Ngọc Chiến jông saiz. Muôv Lò Thị Hà, tsưr tsêr homestay Suối Chiến, thav pâuz: Pâuz tâu cêr khov ntơưv têx kruô nuôv zax, shông 2022, cur ziv nênhs tưz uô tsêr kruô so homestay đros  2 luz tsêr tsar tsôngv nênhs thiaz 3 bungalow, chơư chôngz kruô tuôx ndis saiz thiaz so. Iz chas muôx qơư so nhoz, cux tsênhv muôx qơư uô nox hâuk ntơưv homestay, têx kar nox zos têx zav kaz txơưr hlo ntơưv tsôngv pêx xênhv Poz Ziz. Txix li tsêr homestay tưz sâu tâu nhiax trâu vax tsê txix 15-20 triệu đaiv/ hli.

Xair tsêr homestay ntơưv xã Ngọc Chiến uô qơư so trâu ziv nênhs trâu kaz tuần, muôv Nguyễn Khánh Hòa, kruô nuôv zax tuôx ntơưv thành phố Hà Nội, thav tiak: Muk txos Ngọc Chiến, cur gas siaz trâu tox trôngz hâur pêk, huôz chuô nyiaz hur thiaz ndis saiz đa đêx sor.Têx tsêr homestay ntơưv no pov njôngr cênhz cưv, muôx qơư nox nhoz đar pho, tênhz tso ntâu tưx tais hair nênhs tsơưs, uô trâu zuk zôngx ziv ndơưs. Pêz tsênhv tâu siz thav, nus cêr nox nhoz, txux chi jêx jok, chia tsês cêr ndo tsik plox trâu đruôz siaz txos jêx jok lâuk thiaz têx pêx xênhv Ngọc Chiến ndơưs kruô, hmor yuô.

Nhiax txiax - xã hội Ngọc Chiến zênhv hnuz zênhv hlar yiaz. Cêr siz côngv ntơưv têx zav txơưv pênhv tox trôngz, txux chi đros cêr chai nhiax paz ntơưv nov hâu thiaz cêr gruôs pliak ntơưv pêx xênhv tưz uô tus chưx ntak cxơưz lax luôv, têx zav huôv tsar. Yênhx côngz uô ntêx tưz paz xã hlôngr yiaz tsưr ziv huôv tsar, sâu nju nhiax txiax, chuôz jos chia nuôv zax truôx njês, đros đraiv tsưx tsês txux chi thia tox trôngz hâur pêk.