Nhoz trâu par liax jol Hua Mường, xã Sốp Cộp, pêx xênhv tưz sơưr nzor mul tok đêx lol zưs têx blêx tưz piz huôv, nhav nxias blêx hloz huôv jông. Zơưs Hoàng Văn Thu, Bí thư Chi bộ, Thơưx jol Hua Mường, thav kria: Têx shông lol no, tiv zos nzor kho cưx đêx, mal tưz muôx txâuk đêx lol uô liax chos blêx huv chaix. Cias hâu hli 1 tov kaz sâu tas chiv blêx liax tax, jol tưz gruô hu pêx xênhv mul kho cưx liax. Txos hâu hli 2, pêx xênhv hâur jol tror mul cxênhz têx cưx liax tok đêx cov txâuk lol chos blêx, nhiv no, yax 35 ha liax ntux yiaz tưz tâu pêx xênhv hâur jol chos tas. Đhâu cxênhz, tok đêx Nậm Ca lol trâu têx liax puôr lênhx txâuk cxix cxuô, pêz tsik cxơưx liax tsik muôx đêx zưs.

Mul txos jol Mường Và, xã Sốp Cộp hâur luz chaix no, pêx xênhv tsênhv taz tov cuz siaz lus mul thoz huk cưx liax. Hâux lưv kho cưx liax zuôr paz cov muôx txâuk đêx zưs kôngz lông. Pos Lò Thị Mai, jol Mường Và, haik kria: Cur zis nênhs chos yax 3.000 thiar xưv phaz liax, chia cov muôx đêx lol uô liax thiaz zưs kôngz, mal pêx xênhv tưz thoz huk cưx liax hur si, cov đêx lol tâuk, kho njưs liax chia cov muôx txâuk đêx lol zưs trâu chiv blêx liax ntux yiaz.

Nhiv no, thax tsav xã Sốp Cộp muôx 80 tus cưx liax, xav tok đêx lol đêz txos 92 caik, txâuk đêx zưs trâu 878 ha liax uô 2 chiv thiaz pêx xênhv zôngv đêx uô đuô zav nuv. Chia bax txâuk phaiz đêx chia uô chiv kôngz ntux yiaz, xã Sốp Cộp tưz đros Chi nhánh Công ty TNHH MTV Saiz car zôngv njưs tâur đêx Sơn La số 9 cxênhz hur si têx njưs tâur đêx cưx liax puôk chia saz lax trâu cấp muôx vax huôv njuôk xav tso chai kho, nhav nxias muôx txâuk uô chiv kôngz.

Zơưs Dương Đình Nghị, Phó Chủ tịch UBND xã Sốp Cộp, haik pâuz: Xã Sốp Cộp muôx 405 ha liax ntux yiaz, tov kaz iz luz chaix ntux nas, têx cưx liax tưz muôx hmôngr ar thiaz uô trâu đêx ntưk tsik tâuk, đêx txênhx trâu saz đrâur, tsik txâuk đêx trâu pêx xênhv chos kôngz. Viv li hâux lưv kho têx cưx liax zos hâux lưv tâu xã moz siaz lês uô ntêx hlo cov txâuk đêx zưs trâu chiv blêx ntux yiaz.

Xã Sốp Cộp zos thax tsav chos chiv blêx liax ntux yiaz nzor, li ntơư uô ntêx Tsiaz pêx xênhv tưz laix liax chos chiv blêx liax ntux yiaz zuôr luôs tiar. Txos nhiv no, tas nro xã tưz chos tâu yax 80% chiv blêx liax ntux yiaz. Tov kaz so Tsiaz pêx xênhv tưz nzaz nzơưv têx yar ntux mul kho, thoz huk cưx liax, đoz đrox, tso qir trâu blêx cov sâu hloz huôv jông. Đuô li têx liax chos tsik tâu tas, mal pêx xênhv sir jos chos cov tiar uô ntêx hnuz 10/3.

Cias hâu hli 2, xã Sốp Cộp tưz muôx 3 pazcôngz xưv mul fuô kria, gruô hu thiaz cxênhz yuôx côngz xưv thoz huk cưx liax tok đêx hâur thax tsav xã. Tov kaz zuôr luôs 1 hli kho thiaz thoz huk tâu yax 75 caik cưx liax chia cov muôx txâuk đêx chos cov tas blêx liax huv chaix. Hâux lưv zôngv mair câuk, thoz huk mal tưz txo tsơưs têx ntu muôx khâuz cxơưs ntu gria muôx ntâu hmôngr ar uô trâu đêx ntưk tsik tâuk, thoz huk cov muôx đêx lol chos blêx huv chaix.

Txix li thoz huk cưx liax shir phaz lus hâu shông yiaz, tưz paz zôngx ziv trâu pêx xênhv chos chiv blêx ntux yiaz, paz iz phênhv tưs lês tiar cxuô cêr tuôr xav, hâux lưv huôv tsar nhiax txiax, xã hội tưz tso tơưv.