Pak đêx sor uô luôv Yên Anh, phường Chiềng Cơi, muôx chôngz tus nhuôv zâuk tuôx cơưv uô hâur chaix ntux sor. Car shênhv muôx đêx nưk sor nưk, pak đêx uô luôv paz têx nhuôv zâuk zâu cov tsik nyai đêx đêx, zôngx ziv uô sưv đêx thiaz truz ntêr six hơưv cơưv shâuv, li ntơưr cơưv tâu sai đuô.

Pos Quàng Thị Vân, cưk kria uô luôv đêx ntơưv phk đêx sor Yên Anh, thav pâuz: Txix hâu chaix ntux sor txos nhiv no, cur tưz kria yax 200 tus nênhs cơưv uô luôv đêx, txix 6-15 shông. Iz paz txix 5-10  tus, tâu kria cxix cxuô, chia trơưk têx jâus cơưv fiv huv niax shông thiaz cêr cơưv. Pêz tsik so saiz njôngr, kho yênhx cêr uô luôv thiaz nzuôs têx tsưr ziv nhaz xênhz li đơưk tu sâur lênhs, ndax pâuz thax qơư đêx riaz nênhs.

Têx pak đêx uô luôv li Picenza Aqua Pool, Công ty CP Tso đêx số 1, phường Chiềng An; Tsêr kruô Mường Thanh, Hà Anh, phường Tô Hiệu thiaz Đ&T Plaza, phường Chiềng Cơi... cux lov jêv tsik tsơưs, iz hnuz tok yênhx puô lưv nhuôv zâuk tuôx uô luôv thiaz cơưv uô luôv đêx. Têx qơư puôr lênhx saiz hloz kror nhaz xênhz đros thax tsav uô luôv tâu phaiz fiv huv, muôx cxix cxuô yo ntaz đêx chơưv nênhs thiaz muôx nênhs saiz njôngr tas ntu kriz cêr trâu sơưr đơưk uô luôv đêx.

Đros têx mê nhuôv cơưv uô luôv đêx Picenza Aqua Pool, muôv Lê Thị Nhung, tổ 4, phường Tô Hiệu, thav tiak: Chia mê nhuôv muôx nzir cêr chuôz jos, cur tưz đros cơưv uô luôv đêx đros mê nhuôv, pak đêx ntơưv no lok sik đar thiaz tâu phaiz uô 5 sênhv toz txix  0,6 m txos 0,9 m, lok sik fiv huv trâu nhuôv zâu thiaz nênhs tiar nênhs. Gri txix li 1,2-1,5 triệu đaiv nhiax/khóa, ntơưv no zos kror nhiax thêv fiv huv , paz mê nhuôv muôx tsưr ziv nhaz xênhz.

Cưr Nguyễn Hà Bảo Ngọc, 8 shông, thav tiak: Cưr lok sik jông siaz thâuv tâu cơưv uô luôv đêx chaix ntux sor no, cê muôx fôngx zưs yiaz, cê shâuv cov muôx đas jos thiaz cơưv tsưr ziv uô nênhx nhoz. Cưr tok nrư tov kaz 10 jâus zuôr pâuz uô tâu luôv đêx thiaz pâuz đơưk têx kror riaz nênhs chia zuk tưx chơưv zuk thiaz paz têx nênhs txơưr.

Muôx ntâu pak uô luôv thiaz cêr cơưv txơưx fiv tưz fiv huv cêr khov cơưv uô luôv đêx ntơưv nhuôv zâuk hâur chaix ntux sor, pov njôngr kror moz siaz ntơưv têx niav txir thiaz xã hội txox cêr bax tsưr ziv phax, tar pôngz đêx thiaz paz têx mê nhuôv cơưv shâuv cov muôx đas jos, huôv nzir tsưr ziv nhoz thiaz tưx por hưv zuk tus khênhx.