Jok Lọng Hỏm muôx 362 ziv Hmôngz nhoz xã tox siaz Phiêng Cằm. Txox cêr ti, ndê tox txix jok txos đrôngs xã muk lok txov nhêv, ndax chaix ntux kruôr, muk lok hmôngr ar qo pa lus; txos chaix ntux nas ho gos thiaz bluô. Hâux lưv thâux kôngz lông li poz cưk, kok ntông, cà phê puôr lênhx muôz yêz máy thâux. Têx shuv xênhz tuôx muk cơưv ntơưr cux njiz ntâu cêr phiv liv. Viv li, iz txox cêr lênhv bê tông puôr lênhx zos pêx xênhv thax tsav no cêr xar, chia siaz ntâu tiav nênhx lok. 

Dự án txox cêr Tong Chinh - Na Va, jok Lọng Hỏm, ntêr 7 caik, cêr lênhv bê tông đar 3m, xav hur si yax 15 tỷ nhiax txiax nhiax pênhr têz qơưk hâux lưv huôv tsar nhiax txiax- xã hội thax tsav hair nênhs tsơưs thiaz tox siaz. Ntu fuô lês dự án hâur oz shông 2025-2026. UBPX xã Phiêng Cằm zos tsưr tso nhiax uô; Công ty TNHH Khang Lan, phường Chiềng Sinh, zos đơn vị cxiv puôz. Ntơư zos txox cêr muôx txiax njis lok six zov chênhr trâu xã tox siaz Phiêng Cằm.

Têx hnuz no, sâuv txox cêr taz tov sir jos zênhx max uô cov tiar đrông ntưk. Ntâu paz nênhs tsênhv siz phaiz fuô lês hâux lưv siz luôs jok. Chuôz zênhx tâu sir zôngv tsik tsês; công nhân moz siaz uô tiar têx cưx lias, cưx đêx thiaz lênhv cêr bê tông. Muôx njêx muôs chox car cias ntơưv qơư,  zơưs Trần Thế Khang, Phó Giám đốc Công ty TNHH Khang Lan, haik tiak: Đơn vị taz tov nzaz nzơưv tâu jông ntux, gruô hu tiz nênhs, chuôz zênhx, bax têx paz nênhs cxiv puôz fiv huv. Đros trâu sir jos zênhx max uô cov tiar, đơn vị lok six moz siaz cxiv puôz txox cêr cov jông zos li tsưr ziv tso tơưv. Txos nhiv no, txox cêr tưz lês tiar 70% tsưr ziv, sir jos uô tiar hâur luz 12 hli shông 2026.

Đros trâu pêx xênhv Lọng Hỏm, txox cêr no zos cêr chia siaz txix ntâu shông no. Viv li, txix thâuv dự án tâu fuô lês, 45 ziv nênhs mas tuôr thênhv txos tưz tưx zênhv jav yênhx cxênhz thiar xưv phaz ar, tưx txar lax caz, shôngz ntông chia zok ar, tsik zuôr nhiax. Tsik so sox njôngr txox cêr yiaz thiaz zos iz hâur têx ziv nênhs tas ntâu ar yax, zơưs Por Xênhv Lyk kria pâuz: Chia kriz đar txox cêr, cur ziv nênhs tưz tưx zênhv jav 1.500 thiar xưv phaz ar chos cà phê, poz cưk nhoz hâur thax tsav yaik qơư nhoz yiaz. Tas ar ntâu cur cux khur siv hênhr, taz sik viv jok kror tâu jông ntêr muk. Muôx txox cêr yiaz, pêx xênhv zôngx ziv muk lok, cà phê, poz cưk uô tâu cux zôngx ziv thâux muk lok đuô. Viv li, cur ziv nênhs tưz jông siaz tưx jav ar chia txox cêr no nzor tâu uô tiar.

Zơưs Yênhx Xênhv Zax, Hâu jok cux tsik so muôx njêx muôs cias ntơưv qơư sox njôngr, đros ntơư tsênhv đros đơn vị cxiv puôz siz chos đơưk cov tâu sai têx cêr txov nhêv muôx nzir. Zơưs Yênhx thav pâuz: Nhoz oz saz txox cêr Tong Chinh - Na Va muôx 127 ziv nênhs nhoz uô cê. Ntơư cux zos pêx xênhv thax tsav huôv tsar kôngz lông nhoz uô cê, muôx zuôr luôs 10 ha poz cưk thiaz 985 ha cà phê. Txov nhêv yax mak chiv sâu kôngz, cà phê, poz cưk uô tâu xar xa txos qơư sâu zuôr tsuv muôz yêz máy thâux đhâu txox cêr muk lok hâur tỉnh 113. Thâuv uô tiar txox cêr, tsav yêz, thâux chuôz zênhx uô liax têz, nôngz kôngz, qir mfông muk lok zôngx ziv đuô; cà phê, poz cưk sâu tas tâu yêz lox tuôx zuôr cias ntơưv qơư, tsik tas ntâu jias muk lok thiaz nhiax txiax trâu pêx xênhv.

Chia dự án tâu fuô lês zôngx ziv, xã Phiêng Cằm tưz cxiv tsa paz côngz xưv, đros jok zaz zâuv, gruô hu têx ziv nênhs muôx ar nhoz hâur txox cêr pâuz mênhx txiax njis luôs hâux lưv no. Đros cxiz njôngr nênhs tâu ntiar cxiv puôz zênhx max uô tiar txox cêr, UBPX xã tsik so tso cán bộ chuyên môn cxênhz yuôx cias ntơưv qơư, chia pâuz mênhx hâux lưv uô tâu li chak, zênhx max siz chos tu tiar tâu sai têx cêr txov nhêv muôx nzir hâur ntu cxiv puôz. Sir jos cê uô tiar zos cêr tuôr xav, cê uô jông uô chia txox cêr tâu sir zôngv muôx kaz hâur ntêr shông tov kaz muôz lok sir zôngv.

Zơưs Đặng Tiến Dũng, Chủ tịch UBPX xã Phiêng Cằm, kria pâuz: Tov kaz cxiv kho, nhiv no xã muôx 15 jok; muôx yax 270 caik cêr muk lok jêx jok, xav hur si, muôx 19 txox cêr muk lok hâur ntâu luz xã thiaz 34 txox cêr muk lok hâur jok, hâur ntơư, tsuôk muôx 48 km tâu lênhv tas bê tông. Viv li, hâux lưv cxưx nhiax cxiv puôz, uô tiar txox cêr muk lok muôx txiax njis lok six zov chênhr paz trâu thax tsav. Txox cêr Tong Chinh - Na Va tov kaz uô tiar zuôr txuôk cxuô jok trâu đrôngs xã, paz pêx xênhv zôngx ziv muk lok huôv tsar kôngz txir nox, pâur muôs hax huv, cxơưz huôv tsar nhiax txiax- xã hội thax tsav.

Tâu kror chox car ntov nti ntơưv cấp uỷ, nov hâu thax tsav, đros kror jông siaz côngv đros uô ntơưv pêx xênhv thiaz lês tiar hâux lưv ntơưv đơn vị cxiv puôz, njênhs njôngr tiak txox cêr Tong Chinh - Na Va zuôr nzor tâu uô tiar thiaz muôz zok sir zôngv zos cêr tuôr xav, truz lur txox cêr muk lok txix thax tsav muôx pêx xênhv nhoz chôngz, qơư huôv tsar kôngz lông txos đrôngs xã thiaz têx txox cêr zov chênhr; đros ntơư, kriz đar cêr lax luôv thiaz huôv tsar kôngz lông paz iz phênhv tưs uô tiar txox cêr muk lok ntơưv Phiêng Cằm, zos qơư chuôz muôx jos lox chia têx jok tox siaz pâuz sir zôngv jông thax tsav xênhz txơưv, por hưv pêx xênhv luz nênhx tâu jông.