Txix li qơư chos đar 14 ha, Qơư chos zuz kôngz Mường Hồng tâu tuôr xav cxix cxuô, muôx qơư lês hâux lưv, qơư chos zuz kôngz thiaz thax qơư zok nriar têx tsưr ziv yiaz. Hâu ntơư, thax qơư chos zuz đar yax 13 ha, qơư zok nriar tsưr ziv yiaz đar 1 ha. Nhiv no muôx 2 luz tsêr vak, 2 kror qơư tưx tsuôs đêx, đros trâu 7 cán bộ, kỹ thuật viên lês hâux lưv.

Ntơưv no, têx zav zuz kôngz cux muôx lok six ntâu zav, fiv huv trâu đêx ar, huôz chuô ntơưv thax tsav, têx ntông nox txir, li: Mor môngk, lưv tsiz, bơ, txir đuôx, lưk bax, thênhx caz đros trâu ntâu zav zuz txơưr; tsik tas li tsênhv muôx ntâu zav nôngz Cà phê (THA1, Cartimo), yuôx zêx, ntông Tếch, macca…

Tsưr ziv chos zuz kôngz cux tâu uô tiz jông lês, txix li tsưr ziv xair txos trâu tu thiaz cxênhz yuôx uô ntêx zuôr chos trâu ntơưv têx vax. Cxuô zav hâux lưv puôr lênhx tâu cxênhz ntov nti chia cov têx kôngz hloz jông thiaz fiv huv trâu đêx ar, huôz chuô ntơưv thax tsav. Yax hlo, hâux lưv xair nôngz puôr lênhx tâu uô tiz jông lês, tsi njênhk txâuk chai lok sâuv têx tiêu chí thiaz muôx pênhr xưv tir tar tâu têx caz nox hiav.

Hâur ntu chos, têx hâux lưv li ar nông, no, sor thiaz caz nox hiav puôr lênhx tâu cxênhz ntov nti. Têx qơư tsuôs đêx puôr lênhx tâu đhok hur si, paz trâu muôx txâuk đêx zưs, txo tsơưs hâux lưv sir zôngv nênhs uô nuv. Txix li lês cxix cxuô faz tsưr ziv, têx zuz uô tâu puôr lênhx muôx txos 85%, tyv tsôngv têx zuz chos chiax tâu txix 90 - 95%, siaz đuô têx thax qơư txơưr.

Kỹ sư Trần Thị Hiếu, Trung tâm Paz pêx xênhv uô kôngz thiaz Hlôngr pâur số tỉnh Sơn La, haik pâuz: Chia cov chos tâu têx zuz jông, pêz tưz tsuv moz siaz lês hâux lưv txix li xair nôngz, xair ar, ntiv hnaz txos trâu hâux lưv tu thâuv têx zuz tsênhv zâu. Têx nôngz tâu uô tiz jông xair, tsik chia muôx caz nox hiav, fiv huv trâu đêx ar, huôz chuô, txix ntơư paz trâu têx tuz kôngz sâu tâu nju nhiax txiax sir zôngv.

Qơư chos zuz kôngz Mường Hồng yênhx shông muôs tâu yax 1 triệu zuz kôngz công nghiệp, yax 600.000 tsoz zuz ntông thiaz yax 60.000-70.000 tsoz zuz ntông nox txir. Iz chas muôs trâu têx tuz kôngz hâur tỉnh, tsênhv muôs trâu ntâu thax tsav li: Gia Lai, Quảng Ngãi, Cao Bằng, Lào Cai, Điện Biên,…

Lês hâux lưv zuôr zuz kôngz ntơưv tâu ntâu shông lok no, muôv Lù Thị Kính, jok Nà Ngần, phường Chiềng Sinh, thav pâuz: Cur piz zuôr zuz kôngz ntơưv no txix shông 2022 chia muôs trâu têx nênhs sir zôngv. Iz jias mak cur zuôr txix 15.000 txos trâu 25.000 tus zuz, fênhx đraz oz hnuz mak tuôx thâux iz jâus. Têx zuz ntơưv no cux jông, tsik muôx caz nox, li ntơư pêx xênhv cux njênhs siaz, nhiav zuôr, viv li muôs cux truôx njês đuô.

Zơưs Vương Quốc Hòa, Phó Giám đốc Trung tâm Paz pêx xênhv uô kôngz thiaz Hlôngr pâur số tỉnh Sơn La, thav pâuz: Shông 2026, Trung tâm tuôr xav zuôr muôs cov tâu 3 triệu tsoz zuz. Viv li, đơn vị tưz moz siaz sir zôngv ntâu faz tsưr ziv yiaz chia cov huôv tsar nzir têx zav zuz yiaz. Đros ntơư, kriz đar têx qơư chos, chia cov muôx txâuk zuz muôs trâu têx nênhs sir zôngv. Tsik zos thax qơư uô zuz kôngz xưz, Qơư chos zuz kôngz Mường Hồng tsênhv zos qơư sơưr zov chênhr paz kria nzir têx tsưr ziv yiaz trâu têx tuz kôngz, chuôz jos zov chênhr chia saz kôngz lông hâur thax tsav huôv tsar truôx njês muk ntêr.

Txix li ntơưv Qơư chos zuz ntông nông kôngz Mường Hồng, iz hnuz yênhx cxênhz tsoz zuz tưz tâu muôs trâu têx tuz kôngz. Têx zuz jông, tir tâu caz nox hiav zuôr cxơưz paz zov chênhr trâu hâux lưv sâu nju kôngz, sâu nju nhiax txiax, chia cov cxiv tsa kôngz lông huôv tsar truôx njês./.