Cưr tix Hmôngz hâux lưv nria pax ntâuz, tơưv lâus trâu tsôngk hnar tưz tâu công nhav zos kuz chas txux hâur têz qơưk. Tsưr ziv nria tơưv lâus tưz tâu têx pos, têx niav uô jông kria trâu mê nhuôv nxaik cơưv shâuv. Pos Njuôz Xênhv Tsaz, xã Lóng Luông, huyện Vân Hồ, haik mênhx: Mê nhuôv nxaik Hmôngz muôx 6, 7 shông tưz đros niav shâuv ntok ntâuz, sơưk ntuôs; 9-10 shông shâuv tơưv lâus trâu têx tsôngk hnar, ntok ntâuz, trâuk gax đuz; 15 shông tsuv xơưk tiar tsôngk hnar trâu zuk tus khênhx thiaz zuk tsêr nênhs. Hâur yênhx ziv nênhs, têx pos thiaz têx niav puôr lênhx zos chor nênhs kria trâu mê nhuôv, tuz las, tuz lis pâuz xơưk tâu trâu zuk têx tsôngk hnar jông jav thiaz cơưv shâuv cêr khưr thiax uô tâu nox tâu hâuk.

Hâur hair nênhs Cho cênhz cưv txux chi, tik bê lâuk trâu têx tuz hloz tiar nênhs lok six zov chênhr hâur yênhx ziv nênhs. Zơưs Triệu Văn Hoa, xã Tân Lập, huyện Mộc Châu, kria pâuz: Tus mê nhuôv tuz thâuv tsênhv zâu tsik tâu pâuz muk cêr puôr lênhx tâu txir zơưs thiaz txir puôs sênhr chêr hâur têx hnuz grâuv pax lok sik nox tsiaz. Txos thâuv pâuz muk cêr mak thiax mav shâuv tuôr têk sênhr chêr, chia txưv 7 shông tror sâuv mak thiax tâu đơưk bê lâuk. Txir nênhx Cho cux tsuv cơưv ntơưr, uô nênhz, shâuv haik cưr cxiax chia tâu haik trâu têx hnuz nthuôr cêr lov jêv hâur jok. Têx ziv nênhs tưs muôx nênhs pâuz uô nênhz mak ziv nênhs ntơư tov kaz zuôr muôx txix 1-2 tus tuz tror tâu uô txir nênhz.

Đros ntơư hair nênhs Poz Ziz cux li, hâur cênhz cưv txux chi mak têx jax cưr cxiax, sênhr chêr cux tâu txuôs jông thiaz huôv tsar đhâu ntâu tiav. Cưk txux  Tòng Văn Hỏa, jok Cóng Nọi, phường Chiềng Cơi, Thành phố, thav pâuz: Cur shâuv thiaz pâuz kox trax lâus ndak ntơưv cur tus txir nzơưv. Viv siaz nhiav mak cur tưz muk cơưv shâuv haik cưr cxiax, kox trax thiaz uô tơưv têx trax kox trâu cxuô kror qơư. Zênhv cơưv shâuv zênhv cuz siaz thiaz nhiav đuô li ntơư trax njia tưz nhoz trơưr hâur cur luz nênhx yax 60 shông đhâu. Viv li cur xar kria cxuô tsưr ziv zuk txuôs tâu no trâu têx mê nhuôv, tuz las tuz lis thiaz chor nênhs muôx siaz nhiav kox trax cơưv shâuv chia txuôs jông thiaz huôv tsar zuk hair nênhs têx kuz chas txux.

Tuz Cầm Chí Kiên, 12 shôngx cux nhoz hâur jok Cóng Nọi, zos zơưs Hoả tuz xênhz nzưr, thâuv tsênhv zâu tưz tâu zơưs kox trax trâu mnôngs. Nưk haik: Cur lok six nhiav mnôngs suôz trax no. Thâuv cơưv tas, cur khênhr lok mnôngs thiaz shâuv kox trax, tâu zơưs kria pâuz zuk hair nênhs têx txux chi jông, li ntơư cur hax zav nhiav zuk hair nênhs têx txux chi đuô.

Nhiv no, Sơn La tưz muôx 15 zav txux chi tưz tâu công nhav cấp têz qơưk; hur si tỉnh muôx 2 cưk txux pêx xênhv, 34 cưk txux, zos têx nênhs moz siaz kria pâuz, txuôs jông thiaz huôv tsar pêx xênhv cxuô hair nênhs têx txux chi. Iz chas ntơư, têx shông đhâu, saz Txux chi, Thể thao thiaz Nuôv zax tưz saz lax trâu tỉnh fuô lês ntâu tsưr ziv lol sâuv huôv tsar txux chi tiz nênhs Sơn La, li: Txuôs jông, huôv tsar pêx xênhv cxuô hair nênhs tsơưs tỉnh Sơn La têx jax cưr cxiax, sênhr chêr kror muôx gri đros trâu huôv tsar nuôv zax ntu 2021-2030; Txuôs jông, huôv tsar pêx xênhv cxuô hair nênhs tsơưs têx txux chi đros trâu huôv tsar nuôv zax hâur thax tsav tỉnh Sơn La ntu 2022-2025... Đros ntơư, tsênhv kriz têx jias kria pâuz tsưr ziv uô jông hâux lưv por hưv jông txux chi, paz haik cưr cxiax jêx jok…zaz zâuv hur si sơưr đơưk lês hâux lưv txuôs jông hair nênhs tsơưs têx txux chi, lar haik mal ziv nênhs tsuv muôx phênhv shuôv txuôs tsês.

Nhoz trôngx têz tưs cux li, ziv nênhs puôr lênhx zos qơư chuôz zov chênhr chia txuôs jông thiaz huôv tsar zuk têz qơưk têx txux chi kror muôx gri. Tsik tas li, ziv nênhs tsênhv zos kror qơư chia choz kria fâuv hluôs pâuz saiz hloz txux chi- txiax njis, zuk hair nênhs cênhz cưv kror muôx gri thiaz zênhv hnuz zênhv nhiav têz nhiav qơư.