Xar njôngr Vân Hồ - Luz chaix jông gâux yax hâur shông, pêz zos nênhs nhiav têx zav jông gâux, li ntơư muk kror tưs cux ndo njôngr gra máy cxaik zênhx zav đros đraiv. Sơưr cêr ntơưv thành phố Sơn La, muk tas 130 caik tâus txox cêr yêz lox têz qơưk tiv 6, tas 3 six hơưv thiax txos Vân Hồ. 

Uô ntêx hlo mak pêz muk shuôk jok nuôv zax Hua Tạt, xã Vân Hồ, tâus txox cêr bê tông muk txos ntuô kaz jok, ntơưv luz yar tiax pov mê nhuôv zâuk hnar tsôngk yo Hmôngz yiaz khir taz tov ntâuk tux luz lov jêv ntưk, cxuô txưv njêx muôs luôs nxi, tsơưs pưs kruô tuôx cux zox têk chênh. Têx zav no uô trâu lênhx tưs cux pov chuôs tưz sưv.

Ndis txos tix lâus Tsu Xênhv Tsaz luz tsêr, thơưx tus hluôk Hmôngz hâur jok kriz cêr nuôv zax jêx jok. Têx hnuz no, tsêr homestay A Chu kruô pur tas. Tok pêz, A Chu shir phaz lus haik: Hua Tạt tsik pluôs li thâuv ntêx lơưv. Pêx xênhv tso zênhz tsês, kho vax tsê uô homestay, tsưx hưv têx chax chês txux chi iz txưv Hmôngz muôx li uô ntơưr, tuôr nduôr, đrax tiaz cux li têx kênhx Hmôngz puôr lênhx tâu uô jông khơưk chia piar kria trâu nuôv zax. Jok Hmôngz nhiv no tưz zênhv hnuz zênhv hlôngr yiaz, pêx xênhv luz nênhx tâu jông jux juk.

Sơưr cêr ntơưv jok Hua Tạt, pêz tâus txox cêr yêz lox Têz qơưk tiv 6 grik har muk txos xã Lóng Luông. Tuôx đêz saiz, têx jêx jok nhoz plox lôngs shơư har txir khơưz taz tov tơưs pax đơưz pâus, muôx kro tsoz txir đuôx pax liaz vos, iz saz zos luz vax jâuz pax đax đra pâus, nhoz cax siaz lus. Cxuô tsar zav chuôs iz đaiv đuôz lox jông gâux uô trâu kruô kâus siaz laik.

Ndis luz vax txir khơưz A Phá, tix lâus Phá X Tsaz, nhoz jok Lóng Luông, xã Lóng Luông zos tus tsưr vax, ntơưv no kruô lok six chôngz. Lơưr bax qơư đar tok kruô cov têx yêz muôx txâuk qơư đrêk, tsik tuôr thênhv txos yêz tâus cêr. Têx txir khơưz chos uô yênhx caz thôngz têx mê nhuôv por trôngz nxaz blar, pax txir đuôx tơưs jông gâux siz luôs jok, hâur đruôz đraz luz vax muôx têx luz mê nhuôv tsêr vor grênhz, muôx qơư uô viar viak, trôngx shôngz trâu kruô jâuv uô si cxaik zênhx zav. Iz chas ntơư, tsưr vax tsênhv muôx tsôngk yo Hmôngz trâu kruô ntiar hnar cxaik zênhx zav.

Tsik zos têx vax txir khơưz taz tov tơưs pax đơưz pâus thiax muôx kruô ndis chôngz xưz mak, têx têz jâuz pax đơưz pâus cux uô trâu têx kruô cxuô qơư siaz khiar zênhr thâuv tuôx txos Lóng Luông. Têx pax jâuz đơưz, jâuz đax taz tov tơưs đra pâus jông gâux riz uô trâu têx kruô siaz kâus laik.

Pax txir đuôx tơưs đra pâus thôngz tox trôngz hâur pêk, hâur têx hnuz chaix ntux yiaz yar ntux đris. Thôngz jêx jok pax txir đuôx yiaz khir. Uô trâu cxuô tsar zav hâur luz chaix ntux yiaz Tây Bắc chuôs li hax zav jông jav đuô. Tsik zos li xưz, txix hâu shông 2018 txos nhiv no, xã Lóng Luông tsênhv tso yar grâuv pax chaix pax txir đuôx tơưs chia piar têx zênhx zav jông gâux, trôngx têz, tiz nênhs no cov têx kruô nuôv zax hâur têz qơưk thiaz oz chas têz pâuz txos. 

Muôx six hơưv tâu côngv têx cêr lov jêv txux chi cênhz cưv luz nênhx tox siaz ndis uô si trâu têx qơư jông gâux chuôs zênhx zav txix têx vax txir đuôx, vax jâuz, vax txir khơưz taz tov tơưs pax đra pâus ntux pok huôz niaz, njênhs tiak lênhx tưs cux zuôr ndo njôngr thâuv tưz tuôx iz jâus txos Vân Hồ-hâur luz chaix jông gâux yax hâur shông.