Piz hla trâu trôngx têz thành phố Sơn La, oz saz ntus cêr Lê Duẩn, phường Chiềng Sinh, đêz zuôr luôs 10 caik cêr pov njôngr pax huôv tsar tơưs đra pâus

Txox đruôz đrôngs Thành phố, tâus têx cêr: Hoàng Quốc Việt, Oz lênhx Pos Trưng, Trần Đăng Ninh, thax tsav trôngz Khau Cả, têx thaz nzưr cà phê nhoz thax tsav Vincom Plaza... zos têx qơư pax huôv tsar taz tov tơưs jông gâux. Txos têx qơư no, kruô nuôv zax cê tâu sax têx đêx hâuk kaz, chek-in txaik zênhx zav đros pax huôv tsar, txuôs tsês ntu txơưr hlo tsuôk muôx trâu ntơưv thành phố Sơn La.

Trôngz pax huôv tsar ntơưv Yar tiax lox Tây Bắc zos qơư muôx chôngz kruô nhoz cxuô qơư tuôx nuôv zax, ndis saiz. Ntơưv no, têx ntông pax lâus tâu chos uô cê trâu têx ntar trôngz nxaz blar, kruô nuôv zax muk ndis hâur têx xuz ntông pax huôv tsar, cxais zênhx zav saiz đaz muôs thiaz tâu ndis đros trâu muôx chuô hur si, lax siaz. Đros trâu ndis saiz trôngz pax huôv tsar, kruô nuôv zax tsênhv tâu ndis saiz Mnov zơưv Côngz Hôx đros pêx xênhv cxuô hair nênhs tos kâuv têz hnuz pôngz (Tây Bắc). 

Đros têx fôngx zưs tuôx nhoz thành phố Hà Nội tuôx ndis shuôk Yar tiax lox Tây Bắc thiaz cxais zênhx zav đros pax huôv tsar, pos Hoàng Nguyễn Thúy Quỳnh thav tiak: Gas siaz yax trâu pêz mak zos iz ntar trôngz pax huôv tsar tơưs nhoz ntơưv Yar tiax lox Tây Bắc thiaz ndis saiz têx txox cêr muk trâu Thành phố. Pêz tưz ntiar nênhs plênhr kho zuk njêx muôs cov jông, cxais zênhx zav tsês chia ndo njôngr ntu jông yax đros pax huôv tsar.

Ntâu tus pox niav xair trâu zuk têx tsôngk yo ntêr cênhz cưv, têx yo txiv khơưv jox kror tso hair nênhs Poz Ziz chia cxais zênhx zav đros pax huôv tsar. Pos Hà Thị Lan, thành phố Sơn La, thav tiak: Thâuv ntêx, cur tsuôk zos pov pax huôv tsar tơưs trâu têx tox trôngz, hâur pêk, câuv trôngz, câuv har, têx shông tsik ntêr lok no, pax huôv tsar tưz tâu chos ntơưv têx txox cêr đrôngs jông gâux, pov têx txux chi txơưr hlo trâu đrôngs Sơn La.

Ntông huôv tsar mal siaz txix 2 - 6 thiar, nti tơưr juôr, txaix đơưz liak, ntâu chês ntêr. Pax huôv tsar muôx njik tsư ha xik nênhs, tơưs đra trâu chaix ntux yiaz. Pax huôv tsar muôx ntâu xiv li xiar, đơưz, liaz, taz sik nhoz trâu kâuv têz hnuz pôngz (Tây Bắc), Sơn La, muôx ntâu yax mak xiv đơưz. Luz pax huôv tsar muôx tsiz chês (lok zos tsiz đaiv pax), jê luz mas pax muôx njik liaz plir, liaz buôs, pax cho laiv txiak thâuv muôx chuô yuôz muôx njik thôngx li tik bâux baiv zux nthuôr. 

Đaz nênhs thav tsês pax huôv tsar đros đraiv txox cêr gâux đrâus siz hluz, siz yuô ntơưv tus hluôs gâux Ban thiaz hluôs đrâus Khôm. Jax đaz nênhs thav: Thâuv uz, thax tsav kâuv têz hnuz pôngz (Tây Bắc) muôx iz tus hluôs gâux bê hu uô Ban, jông gâux, siaz đơưz thiaz jông suôz haik cưr cxiax uô tiz nênhs siaz kâus laik. Ntâu lênhx hluôs đrâus tuôx đênhr, taz sik tus hluôs gâux no luz siaz tsuôk zos tsês trâu iz lênhx hluôs đrâus hu uô Khôm, coz tuô tsiax kul thiaz uô têz. Tiav sik hluôs gâux Ban txir tsik nhiav hluôs đrâus Khôm viv pluôs, li ntơư tưz muôz lênhx hluôs gâux no zuôv trâu đuô lênhx hluôs đrâus txơưr hâur jêx jok zuôr.

Pov txir đros tos pox zơưs jêx jok saz lax nox trôngx yôngz, hluôs gâux Ban tso têk đhia muk zok lênhx hluôs đrâus nưk nhiav chơưv nưk. Ndax trâu thâuv hluôs đrâus Khôm muk đêz tsik nhoz tsêr. Tưk cêr chia siaz, hluôs gâux Ban thiax khi nưk txox fuôv txiax trâu lênhx hluôs đrâus Khôm tus tơư ntair luz tsêr, tas ntơư hla trôngz, hla har muk zok lênhx hluôs đrâus. Suôx câuv, tas jos, lênhx hluôs gâux vâu kâus trâu tox trôngz txox siar tu. Kror qơư ntơư, tov kaz no tuôx iz zav ntông tơưs pax đơưz pâus trâu chaix ntux yiaz. Pêx xênhv jêx jok thiax ti bê hu uô pax huôv tsar thiaz saiz ntơư zos zav pax ntâuk gri trâu cêr gâux đrâus siz hluz tsik hlôngr siaz njưk.

Hok hluôs đrâus Khôm tror lok pov hluôs gâux tưz khiar lơưv, thiax muk zok. Suôx câuv, lênhx hluôs đrâus cux tas đas jos, tas txox sia, txia uô njuôs iaz nhoz cuôs uz cuôs no tsik muôx gơưv. Txos chaix ntus yiaz, thâuv pax huôv tsar tơưs, njuôs iaz ho tror tuôx pur ntia iz cxia qơư … Txix ntơư, iz luz chaix ntux yiaz lol, pax huôv tsar tơưs đơưz vos har jôngr, har tsuôs, hluôs gâux, hluôs đrâus Sơn La ho siz zâuv muk grâuv pax, grâuv đruôk, haik cưr cxiax, sênhr chêr thiaz thav cêr gâux đrâus, xar cov muôx cêr hluz tsik hlôngr siaz njưk li hluôs gâux Ban thiaz hluôs đrâus Khôm.

Zơưs Lò Văn Lả, cưk txux pêx xênhv txux Poz Ziz, tổ 7, phường Tô Hiệu, thav pâuz: Pax huôv tsar trâus siaz nhiav cxuô hair nênhs tos kâuz têz hnuz pôngz, yênhx iz zav pax pur ntia cxuô thax tsav, tsik zos têx pax tơưs jông gâux, ntâu đuô njuôk li cxuô zav pax txơưr, mak viv ntơưv no zos zav pax tơưs đros đraiv jax đaz nênhs cêr gâux đrâus siz nhiav, siz hluz tsik hlôngr yiaz ntơưv hluôs đrâus Khôm thiaz hluôs gâux Ban.

Chaix pax huôv tsar tơưs hâur yênhx shông cux zos jâus chia pêx xênhv cxuô hair nênhs Poz Ziaz kriz têx jâus gruôv pax, li: Kho jêx, jok, hluôs gâux Han, Kin pang then thiaz Guôv pax pax huôv tsar tơưs... Pêx xênhv hair nênhs Poz Ziz tsênhv zôngv pax huôv tsar chia bôngs nzir cêr jông gâux thiaz uô tơưv têx zav kar nox, tênhr tiav cêr txi xênhz têz xênhz qơư thor cêr cov uô tâu kôngz lông, thor côngz hmôngr thiaz xa cêr njênhs khov vav lox hloz lok sâuv muôx iz luz nênhx jông njias to, nox tsâu, hnar jông, shir phaz.

Pax huôv tsar tơưs tưz yênhx iz zav pax txơưr hlo trâu chaix ntux yiaz tos kâuv têz hnuz pôngz haik tas nro thiaz ntơưv thành phố Sơn La haik khênhx. Txos luz 3 hli ntiax têz yênhx shông, pax huôv tsar siz tưr tơưs yiaz chuôs li chơư têx kruô nuôv zax cxuô qơư tuôx ndis saiz shuôk./.