Thành phố Sơn La muôx jông tox trôngz hâur pêk, đros têx kror tsuô, pak đêx lox, đêx sor ntâu tsar zav; têx tiz nênhs nhoz trâu thax tsav muôx txux chi jông txơưr hlo, zôngx ziv trâu hâux lưv uô tơưv têx hax huv nuôv zax txux chi muôx gri. Pos Lù Thị Đoàn, Trưởng phòng Txux chi Thành phố, kria pâuz: Thax tsav Thành phố nhiv no muôx 7 kror qơư tsêr kruô so homestay uô nuv, uô tâu nhiax txiax muôx liv, li: Homestay Minh Châu, homestay Long Trang, jok Hụm, xã Chiềng Xôm; homestay Minh Trường, jok Hùn, xã Chiềng Cọ; homestay Tiến Quân, homestay Xuân Phương, homestay Lù Hôm, jok Bó, phường Chiềng An; homestay Sơn Khè thiaz homestay Quàng Hôm, jok Mòng, xã Hua La... Iz shông muôx yênhx cxênhz lưv pưs kruô nuôv zax tuôx ndis shuôk, paz tsưx tsês thiaz huôv tsar txux chi tiz nênhs.

Zos iz hâur têx ziv xuz huôv tsar uô tsêr kruô zâu homestay ntơưv jok Bó, phường Chiềng An, zơưs Lù Tiến Quân, tsưr tsêr Homestay Tiến Quân, thav pâuz: Kriz zôngv txix luz 7/2017, txos nhiv no, cur tưz kho cxaz nzir 1 luz tsêr tsar lơưx thiaz cxiv tsa yiaz nzir 1 luz tsêr, txâuk tok li 40 tus kruô/hnuz. Shông 2021, dự án “Cxiv tsa qơư kho đuô nox nhoz đhâu kria nuôv zax kôngz lông txos cxuô hair nênhs tsơưs thax tsav tox siaz tỉnh Sơn La, Việt Nam” paz cur ziv nênhs uô tsêr vak đar 80 thiar xưv phaz chia chos pax uô qơư jông saiz, jông tsêr kruô so homestay, gruô hu tâu ntâu tus kruô nuôv zax tuôx shuôk, tuôx ndis.

Txos jok Hùn, xã Chiềng Cọ, kruô nuôv zax zuôr tâu côngv lês têx hâux lưv uô liax, cxov njêk, ndis đê txir nkhơưz kaz jiz, cà phê, uô kôngz lông đros pêx xênhv. Hâur hli 8/2024, Phòng Txux chi Thành phố đros UBPX xã Chiềng Cọ, Yar cơưv Đại học Tây Bắc kriz kria paz nênhs cơưv nzir tsưr ziv uô nuv nuôv zax trâu 35 ziv uô luôv nuôv zax tsôngv pêx xênhv thax tsav xã.

Zơưs Tòng Văn Trường, tsưr tsêr kruô Homestay Minh Trường, jok Hùn, kria pâuz: Tuôx cơưv nzir, cur thiaz têx ziv uô luôv tâu kria nzir ntâu txux chi muôx liv, lar haik mak qêz, por hưv cêr nyiaz hur; hâux lưv taz kruô yiaz, têx qar tsêr trâu kruô so; tsưr ziv thav pêv, tu saiz kruô nuôv zax; saiz car nhiax txiax, sâu cov tâu nju nhiax đuô, kriz cêr nuôv zax.

Qơư kriz cêr nuôv zax tsôngv pêx xênhv jok Mòng, xã Hua La, đêz đrôngs thành phố Sơn La li 3 caik cêr, muôx têx qơư đa đêx sor, ndis saiz txux chi thiaz kar nox tiz nênhs Poz Ziz zos qơư chia siaz trâu têx kruô nuôv zax. Nhiv no, têx ziv nênhs tưz cxiv tsa, kho đuô, yôngv siaz jông tsêr kruô zâu homestay, qơư đa đêx, tsêr nox hâuk; jok Mòng tưz tsa tơưv câu lạc bộ nthuôr txux chi cxuô zav nênhs; câu lạc bộ sênhr chêr Poz Ziz chia nthuôr trâu kruô nuôv zax saiz car. 

Muôv Nguyễn Khánh Hiền, nhoz ntơưv thành phố Hà Nội tuôx, thav tiak: Hâur jâus tuôx shuôk cxênhz jê ziv nênhs ntơưv Sơn La, cur tâu ziv nênhs chox muk trâu jok Mòng đa đêx sor thiaz nox siv hno tiz nênhs Poz Ziz. Cur pov zos chai thiaz huv siaz trâu têx hâux lưv kriz cêr nuôv zax ntơưv no.

Sir jos huôv tsar nuôv zax jêx jol zos pêx xênhv tus đros trâu huôv tsar cênhz cưv cxuô hair nênhs, Thành phố tsik tsês uô jông tuôr xav, cxiv kho nzir thiaz por hưv têx qơư ndis nuôv zax jông saiz, li tsêr tsar lơưx, liax, kror tsuô, pak đêx lox; pak nur njêk, đêx zâu, tox trôngz, har jôngr cxuô zav, vax, trôngz pax txir nkhơưz kâuz, txir nkhơưz kaz jiz, cà phê. Chox car têx xã, phường zaz zâuv têx ziv nênhss cxiv tsa têx zav qơư nox nhoz so cov jông thiaz muôx têx hâux lưv trâu kruô nuôv zax khov. Cêr nthuôr txux chi têx paz haik cưr cxiax sênhr chêr pêx xênhv; kho đuô uô têx hâux lưv cênhz cưv; kriz saiz têx cêr lov jêv uô si pêx xênhv tênhx tus, nthuôr txux chi, cưr cxiax, uô hâux lưv kôngz lông..., siz chos kria, fuô kria txos têx đuôz lok sâuv tiz nênhs, cêr txơưv zênhx, truôx qơư ntơưv Thành phố Sơn La./.