Thành phố Sơn La nhiv no muôx yax 1.000 ha txir nkhơưz kaz jiz, muôx ntâu trâu têx xã Chiềng Cọ thiaz Chiềng Đen. Têx txir nkhơưz tâu chos uô ntur juk, tơưs pax đơưz vos pur ntia têx ntar trôngz, vok har uô trâu tox trôngz hâur pêk ntơưv no chi cax. Têx trêk pax txir nkhơưz tơưs đơưz nhiak njaik chuôs ntâuz tsux, puôs ndis têx chês ntông nti tơưr juôr, ntông lâuk, shơư đros têx vax tsê pênhv yênhx iz đaiv zênhx zav jông gas siaz thiaz muôs jos ho nziv nhoz. Thâuv muôx têx ntưr chuô yuôz gas cik, têx trik pax cho tưx zưv trơưk chuô yuôz jông li lok đâuk, uô trâu ntâu tus kruô đai siaz đhuôv, mêv mux ku.

Shông no, pax txir nkhơưz piz tơưs trâu luz 1 hli gris thiaz tơưs đra li 10 – 15 hnuz, chia cov pov tâu têx pax txir nkhơưz tơưs đra, ntâu tus nênhs tưz khov txos têx tsưr vax xair huv hnuz nhôngs six hơưv pax jông yax chia tuôx saiz thiaz txaik zênhx zav saiz đaz muôs.

Tsik chia têx pax txir nkhơưz tơưs đuô chaix, muôv  Lò Thị Phương Chi, huyện Sông Mã đros têx fôngx zưs tuôx txos thành phố Sơn La chia txaik zênhx zav, saiz têx pax txir nkhơưz trâu ntu tơưs đra yax. Muôv Lò Thị Phương Chi haik tiak: Đhâu mạng xã hội, cur pov cxuô tus nênhs tso pax txir nkhơưz tơưs uô trâu cur lok sik nhiav, cuz siaz li ntơư tưz zâuv fôngx zưs tuôx txos vax pax txir nkhơưz xã Chiềng Cọ txaik zênhx zav, txơưv ntux lok sik no taz sik tâu saiz têx pax txir nkhơưz tơưs txâuk siaz thiaz tưz txaik tâu têx đaiv zênhx zav jông .

Chaix pax txir nkhơưz kaz jiz tơưs ntơưv thành phố Sơn La tsik zos jông gâux gas siaz xưz mak tsênhv pênhv yênhv iz kro qơư sâu tâu nhiax txiax tsênhv chênhz, paz cxiv kho pêx xênhv ntơưv no ntu nênhx. Đros trâu đê txir, ntu txir nkhơưz kaz jiz tơưs pax đra pâus, ntâu tus tsưr vax pax tưz yâu mông sâuv têx faz mạng xã hội đros qơư nhoz mênhx pêv, lêx xor tôngx gra đros chêr chia têx kruô nuôv zax pâuz tuôx ntox ndis saiz pax.

Pâuz tâu cêr khov vav ntơưv têx kruô, uô ntêx pax txir nkhơưz zuôr tơưs, têx tsưr vax tưz ndo njôngr muk tu, kho thax tsav vax uô ntêx thâuv zuôr piz tơưs pax chia tok kruô tuôx ndis saiz, txiak zênhx zav. Ntâu tus tsưr vax tưz bax  tsôngk hnar, têx tos khoz đror, têx zav plênhr kho njêx muôs jông chia txaik zênhx zav, qơư nox hâuk, qơư so đhâu hnuz hmo... Thêv nhiax muk ndis saiz vax pax txir nkhơưz kaz jiz cux fiv huv siz bâus 20 cxênhz nhiax/nênhs.  

Zơưs Quàng Văn Lán, tsưr vax pax txir nkhơưz kaz jiz Chiềng Cọ Farm, jok Hôm, xã Chiềng Cọ, thav tiak: Yax sha hnuz ntâu lok no, xưk li hnuz tưs, vax pax txir nkhơưz kaz jiz cur ziv nênhs cux muôx chôngz tus kruô tuôx txos saiz pax thiaz txaik zênhx zav, chôngz yax mak 2 hnuz kaz tuần. Xav siz bâus iz hnuz muôx li 200-300 pưs kruô, sâu tâu yênhx puô cxênhz txos ntâu triệu đaiv nhiax. 

Chaix pax txir nkhơưz kaz jiz tơưs cux zos ntu cêr xav chia têx nênhs txaik zênhx zav tuôx cxaik zênhx zav zok têx ntu jông yax. Têx qơư no pur pax txir nkhơưz kaz jiz đơưz pâus, đros đraiv ntux yar chi hnuz tuôx li ntơư têx đaiv zênhx zav lok sik jông saiz, uô trâu ntâu tus nênhs cxaik zênhx zav moz siaz txos. Tix lâus Trần Cường, nênhs cxaik zênhx zav thành phố Sơn La, thav tiak: Chaix pax txir nkhơưz kaz jiz tơưs ntơưv Sơn La lok sik kho siaz, muôx txus thiaz chơư tâu cur blôngx siaz thâuv tưs ntux yiaz tơưv. Tox trôngz hâur pêk ntơưv no lok sik jông, fiv huv chia cxaik zênhx zav đros tox trôngz thiaz têx zênhx zav. Cias hâu chiv pax tơưs tưz muôx ntâu tus kruô tuôx tênhv chaix nhôngs chia cxaik zênhx zav, gri cxaik zênhx zav tus khênhx txix 300 – 700 cxênhz đaiv nhiax/nênhs; paz nênhs mak zuôr gri txix 2 – 3 triệu/paz.

Chaix pax txir nkhơưz kaz jiz tơưs tưz yênhx iz kro qơư phax txos trâu cêr huôv tsar nuôv zax ntơưv xã Chiềng Cọ. Xã taz tov cxơưz paz pêx xênhv, têx tsưr vax kho đuô, tu saiz têx vax txir nkhơưz kaz jiz, cxiv tsa huôv tsar nuôv zax jêx jol zos pêx xênhv tus, kriz ntâu tsar zav chia fiv huv têx kruô nuôv zax đêz jê cêr chia siaz. Đros ntơư, xã chox car cán bộ thiaz pêx xênhv trâu siaz yâu mông, kror jông gâux ntơưv pax txir nkhơưz hâuv mạng xã hội chia chôngz tus pêx xênhv thiaz kruô nuôv zax pâuz txos. 

Pax txir nhkơưz tơưs đra ntơưv thành phố Sơn La tưz yênhx “zav jông txơưr hlo” ntơưv têx nênhs nhiav tox trôngz hâur pêk thâuv iz luz chaix ntux yiaz lol. Tok kaz chiv pax, têx ntông txir nkhơưz ho txi txir tênhv trâu iz chiv đê tâu nju têx txir.